Posibleng matapos sa katapusan sa Nobyembre ning tuiga ang impeachment trial ni Vice President Sara Duterte, kung mokunhod sa napulo ka adlaw ang ihangyo nga panahon sa iyang defense team alang sa pagpresentar sa ilang mga ebidensiya ug pagtubag sa mga alegasyon batok kaniya.
Gipadayag kini ni Batangas Representative Gerville Luistro, ang lead prosecutor sa impeachment case, kinsa miingon nga mahimo kining mahitabo kung limitado lamang sa napulo ka trial days ang depensa, imbes sa 30 ka adlaw nga gilatid sa pretrial order sa Senate Impeachment Court kaniadtong Hunyo.
Pagpasabot ni Luistro nga ang 30 ka adlaw nga gihisgotan sa maong order adunay kalabotan sa upat ka impeachment articles. Apan human bawion sa mga prosecutor ang tulo ka kaso; ang bribery, grave threats, ug confidential funds nga kasi, diin usa na lamang ang nahibilin nga alegasyon batok sa bise presidente mao ang sa dili hustong pagdeklarar sa iyang mga kabtangan o unexplained wealth.
Kung molapas sa napulo ka adlaw ang presentasyon sa depensa, posibleng mosangko na sa Disyembre ang paghusay, sumala pa kang Luistro.
Samtang, nagkanayon si Deputy Speaker Janette Garin nga posibleng makuha sa prosecution ang gikinahanglang 16 ka boto alang sa pag-convict kang Duterte kon dili kini motambong sa iyang impeachment trial ug motubag sa mga pangutana kalabot sa iyang bahandi.
Gihisgutan usab ni Garin ang testimonya ni forensic financial analyst Atty. Alexander Cabrera, kinsa mipadayag kaniadtong Septyembre nga posibleng adunay labing menos ₱817.8 milyon nga mga kabtangan ang bise presidente nga wala maideklarar sukad 2022.
Kahidnumdoman nga gisugdan ang impeachment trial kaniadtong Hulyo 6, ug naglaum ang prosecution nga mahuman kini sa ayha ang Pasko.
