Gipalihok sa Department of the Interior and Local Government (DILG) ang mga lokal nga panggamhanan ug mga barangay sa tibuok nasud aron masiguro ang malinawon ug luwas nga paghinumdom sa Undas 2026, ilabina sa gipaabot nga pagdagsa sa mga tawo sa mga sementeryo ug memorial parks karong Nobyembre 1 hangtod ugma, Nobyembre 2.
Pinaagi sa gipagawas nga memorandum circular, gimandoan sa DILG ang mga lokal nga panggamhanan nga magpatawag og tigom sa ilang Local Peace and Order Councils aron hisgotan ug ipahimutang ang mga lakang alang sa seguridad, pagkontrolar sa panon sa mga tawo ug pagdumala sa trapiko.
Lakip usab sa gipalihok ang mga barangay tanod, mga kawani sa panglawas, tigpatuman sa trapiko ug uban pang pwersa nga motabang sa pagmintinar sa kahapsay ug kalinaw sa ilang tagsa-tagsa ka lugar.
Base sa datos sa DILG, mokabat sa 282,989 ka barangay tanod gikan sa 42,010 ka barangay sa tibuok nasud ang andam nga ipakatap isip dugang pwersa sa seguridad, kauban ang kapin 111,000 ka pulis nga magpatrolya sa mga lugar nga gipaabot nga daghang tawo ang mobisita.
Samtang, pipila na ka lokal nga panggamhanan ang nagpatuman sa ilang tagsa-tagsa ka pagpangandam alang sa Undas.Sa Baguio City, gipatuman ang Oplan Kaluluwa ug Oplan Harabas nga naglangkob sa mga lakang alang sa seguridad, pagdumala sa trapiko ug paglikay sa sunog.
Sa Sagada, nagpahigayon usab og kampanya sa pagpahibalo ang kapulisan ug mga grupo sa barangay peacekeeping aron pahimangnoan ang publiko batok sa pagpangawat ug uban pang posibleng insidente, lakip na ang mga turista nga mobisita sa lugar. Dugang pa, nagpagawas usab og mga lagda ang Mandaue City aron mapadayon ang kahapsay ug kaluwasan atol sa pagsaulog sa Kalag-kalag.
Samtang, gihimo sa Malolos City ang pag-ayo sa mga dalan pinaagi sa pagbutang og bag-ong sapaw sa aspalto ug pagtak-op sa mga naguba nga bahin sa karsada duol sa sementeryo sa Barangay Panasahan aron masiguro ang mas luwas nga pagbiyahe sa mga motorista ug mga pedestrian.
Sa pagkakaron, padayon ang pagpangandam sa mga lokal nga panggamhanan ug mga ahensya sa gobyerno aron malikayan ang mga insidente ug masiguro ang kahapsay sa pagbisita sa mga sementeryo karong Undas.
