DAVAO CITY – Tugpa sa balay tambalanan ang usa ka 19 anyos human gidunggab sa iyang menor de edad nga kainom kagabie, pasado alas 7, Oktobre 13 ning tuiga sa Zone 4, Km. 11, Sasa ning siyudad.
Subay sa rekord, giila ang biktima nga si alyas Mhel, residente sa Cadunan Davao Oriental, samtang ang 17-anyos nga suspetsado, kasamtangang nagpuyo sa Sasa ning siyudad.
Sa nahimong imbestigasyon sa kapulisan, ayha matud pa ang maong panghitabo, nagsabay matud pa og inom ang biktima ug suspetsado sa usa ka balay sa naasoyng dapit ug nananghid nga muuli una ang suspek, apan sa pagbalik niini, nagdala na kini og hinagiban.
Gihasi sa suspek ang biktima sa makadaghang higayon rason nga naglalis ang duha ug sa wa damhang higayon, kalit matud pa nga giduslak sa suspek ang biktima sa wala nga bahin sa nawong ug gilayong misibat human ang insidente.
Hinoon, gilayon sab nga gidala sa balay tambalanan ang biktima, samtang anaa na sa kustodiya sa kapulisan ang suspetsado alang sa tukmang disposisyon.
