Giduso ni Senator JV Ejercito ang pagdoble sa binulan nga social pension sa mga kwalipikadong indigent senior citizen gikan sa P1,000 ngadto sa P2,000 aron makatabang sa ilang pagkaon, tambal, panglawas ug uban pang pangunang panginahanglanon.
Pinaagi sa Senate Bill No. 2522, gisugyot ni Ejercito nga usbon ang Republic Act No. 11916, nga maoy nagtakda sa kasamtangang P1,000 nga social pension alang sa mga kwalipikadong indigent senior citizen.Sumala pa sa senador, dili na igo ang kasamtangang kantidad tungod sa padayong pagsaka sa presyo sa pagkaon, maintenance medicines, healthcare, utilities ug transportasyon.
Lakip usab sa gisugyot nga kausaban ang pagpalapad sa depinisyon sa indigent senior citizen aron maapil ang mga tigulang nga walay pension o permanente nga tinubdan sa kita, ingon man kadtong nakadawat og pension, compensation o financial assistance nga dili molapas sa P10,000 kada bulan.
Ang Department of Social Welfare and Development o DSWD maoy motino kung kinsa ang kwalipikado nga makadawat sa social pension ubos sa maong panukala.Dugang pa, tangtangon usab sa gisugyot nga balaod ang requirement nga ang indigent senior citizen kinahanglan “frail, sickly or with disability” aron mahimong benepisyaryo sa social pension.
Gisugyot usab ni Ejercito nga obligahon ang DSWD, uban sa pag-apruba sa Department of Budget and Management o DBM ug konsultasyon sa mga hingtungdan nga sektor, nga repasuhon ang kantidad sa social pension matag duha ka tuig ug magpatuman og kausaban kung gikinahanglan.
Sa pagkakaron, anaa pa sa proseso sa Senado ang maong panukala nga nagtumong sa pagdugang sa ayuda alang sa mga senior citizen nga nanginahanglan og dugang nga pinansyal nga suporta.
