Dili insakto ang P64 sa pang-adlaw adlaw nga pagkaon sa usa ka Pilipino sulod sa usa ka adlaw.
Kini ang gipahayag sa National Nutrition Council (NNC) homan sa giluwatang pamahayag sa National Economic Development Authority (NEDA) nga dili “food Poor” ang pagasto ug P64 sa pang-adlaw adlaw nga pagkaon sa usa ka Pinoy.
Matod pa sa NNC, dili kini insakto aron makab-ot sa usa ka tawo ang girekomendang enerhiya ug nutrients alang sa lawas.
Nag-ugat ang pagsaway ni NNC Cordillera Administrative Region (CAR) nutrition program coordinator Bella Basalong gumikan sa gipagawas nga pamahayag ni National Economic and Development Authority (NEDA) Secretary Arsenio Balisacan sa pagdungog sa Senado nga niadtong 2023, ang monthly food threshold sa usa ka pamilya nga adunay lima ka miyembro ang mubalor sa P9,581 kun P64 matag tawo sa usa ka adlaw.
Nagpasabot kini nga ang usa ka tawo nga mugasto ug mas taas pa kung ikumpara sa nahisgutang kantidad, ang dili makunsederang food poor.
Matod pa ni Basalong, karaan na ang kasamtangang threshold sa NEDA gumikan kay ang P64 ang mamahimo lamang ipangbayad sa usa ka pagkaon sa pagkakaron gumikan sa hataas nga inflation rate.
Unang giawhag sa mga senador ang NEDA nga rebyuhon ang threshold niini aron maseguro nga insakto ang forecast sa kalisod, butang nga gipaburan usab ni Balisacan.
Samtang sa lower house, gikwestyon usab ni House Deputy Minority Leader ug ACT Teachers party-list Rep. France Castro ang pahayag sa NEDA nga dili food poor ang mga indibiduwal nga migasto ug P64 matag adlaw sa pagkaon.
Matod pa sa opisyal kung asang planeta nabuhi ang mga taga NEDA aron isulti kini? Dugang gipahayag pa niini nga nasulayan kaha sa taga NEDA nga mabuhi sa P64 lamang alang sa pagkaon sa tibuok adlaw ang magasto? Gumikan niini, gusto karon sa magbabalaod nga ipaklaro usab kini sa Department of Trade and Industry (DTI).
