Nisaka na sa 34 ang kumpirmadong patay sa Metro Manila, Calabarzon, ug Central Luzon tungod sa paghapak sa bagyong Carina.
Mao kini ang gitaho sa Philippine National Police diin dose sa mga namatay gikan sa Calabarzon, 11 sa Metro Manila, siyam sa Central Luzon ug duha sa Bicol.
Samtang 17 ka mga tawo usab ang gikataho nga naangol, ug lima ang missing sa Central Luzon ug CALABARZON.
Matud ni PNP public information officer Col. Jean Fajardo nga 22 ang namatay tungod sa pagkalumos samtang lima ang nakuryentihan, unom ang nalubong sa landslide ug usa ang naigo sa natumba nga kahoy.
Mokabat sa 1,319,467 ka mga tawo o 299,344 ka pamilya ang apektado sa Carina, ug Butchoy sa tanang rehiyon sa nasod gawas sa Eastern Visayas, sumala sa NDRRMC.
Sa apektadong populasyon, 211,396 ka tawo o 53,414 ka pamilya ang nagpabilin sa evacuation centers samtang 675,932 ka indibidwal o 114,735 ka pamilya ang nagpuyo sa laing dapit.
