Nagtuo si Batangas 2nd District Representative Gerville Luistro nga makatabang sa pagpalig-on sa morale sa mga miyembro sa Lakas-CMD ang pagsulod sa partido ni House Majority Leader Sandro Marcos, taliwala sa pagkadakop ug pagkabilanggo ni kanhi House Speaker Martin Romualdez may kalabotan sa plunder case.
Gikumpirma nila ni Luistro ug House Deputy Speaker Janette Garin kaniadtong Huwebes, Oktubre 16, 2026 ang pagbalhin sa anak ni Presidente Ferdinand Marcos Jr. ngadto sa maong partido.
Sumala kang Luistro, ang presensya ni Sandro isip House Majority Leader ug anak sa Presidente posibleng makadugang sa kumpiyansa sa mga miyembro sa Lakas-CMD.
Malipayon usab nga gidawat ni Garin ang bag-ong miyembro, ug miingon nga abli ang partido sa mga batan-on nga makatampo sa ilang mga adbokasiya.
Sa laing bahin, gilimod nila Luistro ug Garin nga ang pagbalhin ni Sandro gitumong aron kontrolon ang impluwensya ni kanhi Presidente Gloria Macapagal-Arroyo sulod sa partido. Gipanghimakak usab nila ang koneksiyon niini sa mga espekulasyon nga posibleng mopuli si House Speaker Bojie Dy kang Vice President Sara Duterte kung makombikto kini sa impeachment trial.
Matud ni Luistro, wala siyay makita nga kalabotan tali sa pagbalhin ni Sandro sa Lakas-CMD ug sa impeachment case. Sayong hisgotanan pa usab ang posibleng mopuli sa Bise Presidente gumikan kay wala pa ang husay, dugang sa kongresista.
