Gikuwestiyon ni Davao City 1st District Representative Paolo “Pulong” Duterte ang pag-atras sa prosecution panel sa tulo ka articles of impeachment batok kang Vice President Sara Duterte human sa mga bulan nga giakusahan ug gisaway ang bise presidente.
Sa iyang pahayag, gikritika ni Pulong ang panel tungod sa desisyon nga iyang gihulagway nga kalit nga pag-atras human sa dugay nga proseso ug mga alegasyon batok sa iyang igsoon.
“Pagkatapos ninyo mangbugbog, basta na lang kayong aatras nang ganon-ganon lang?” matud ni Pulong.
Dugang pa niya, kon lig-on ang ebidensiya ug adunay igo nga basihan ang mga alegasyon, angay nga ipadayon kini ug ipresentar ang mga pamatuod imbes nga moatras.
Gipasiugda usab sa kongresista nga ang impeachment dili angay himuong dulaan sa politika ug nga ang mga akusasyon nga gipakaylap batok sa bise presidente adunay epekto nga dili basta mawala tungod lamang sa pag-atras sa kaso.
Gipangutana usab ni Pulong ang kantidad sa kuwarta sa katawhan nga nagasto sa 38 ka adlaw nga proseso nga iyang giingong gigamit sa pagpugos ug pagdaot kang VP Sara.
Sa pagtapos sa iyang mensahe, gipahinumdoman niya ang prosecution panel sa ilang responsibilidad ug miingon nga ang mga nag-akusar kinahanglan andam usab manubag sa ilang mga pahayag.
Ang maong pahayag nagpaila sa pagsupak ni Pulong sa desisyon sa panel, samtang nagpabiling sentro sa diskusyon ang pag-atras sa tulo ka articles of impeachment batok sa bise presidente.
