DAVAO ORIENTAL- Nakadawat ug livelihood assistance ang kanhing mga rebeldeng New Peoples Army human sa ilahang pagpailawom sa Enhanced Comprehensive Local Integration Program kon ECLIP cash assistance ug firearms remuneration kon bayad sa mga gisurrender nga mga armas sa mga nahisgutan kagahapong adlawa sa Happy Home, Brgy Don Martin Marundan, Mati City Davao Oriental.
Mokabat sa 15 ka mga kanhing rebelde ang migradwar sa Happy Home Halfway House nga proyekto sa Probinsyal nga Panggamhanan ug nakadawat ug livelihood cash assistance nga nagkantidad og P65,000.00 ang matag usa kanila.
Samtang nakadawat sab ug cash incentives ang 26 ka mga kanhing rebelde human sa ilahang pagtugyan sa armas sa gboyerno atol sa ilahang pag-surrender.
Gipasalig sab sa kagamhanan ilabi na sa DILG nga pabiling nagasuporta ang gobyerno ug molampos kini sa bag-ong gitaak nga kinabuhi human nga mibalik sa sabakan sa balaod.
Gipanghinaot usab niini ngadto sa mga nahisgutan nga magsilbi kining ehemplo ug sumbanan sa uban nga pabilin pa gihapon nga anaa sa kabukiran.
Ang maong kalihukan ang gitambungan nila 701st Brigade Commander BGen Oliver C. Maquiling sa Philippine Army, Philippine National Police (PNP) Provincial Director PCol Julius E. Silagan, DILG Provincial Director Orle A. Cabaobao, Provincial Social Welfare and Development Office (PSWDO) Head Juvy G. Bonita-Abarca, ug PSWDO Division Chief Aileen Lardizabal ug Davao Oriental Governor Ninyu Uy.
