GIikumpirma sa Office of the Ombudsman nga nadawat na niini ang referral sa National Bureau of Investigation (NBI) kalabot sa ilang imbestigasyon sa Statement of Assets, Liabilities and Net Worth o SALN ni Bise Presidente Sara Duterte.
Sumala sa Ombudsman, ipailalom sa inisyal nga ebalwasyon ang referral ug ang mga dokumentong gilakip niini aron matino ang angay nga aksyon.
Lakip sa posibleng lakang ang pagpahigayon og dugang nga imbestigasyon kon gikinahanglan, subay sa mga lagda sa balaod.
Gipaniguro usab sa Ombudsman nga patas ug walay pagpihig sa kolor sa politika ang pagdumala sa maong kaso.
Una nang gisumite sa NBI ngadto sa Ombudsman ang referral human nakit-an sa ilang imbestigasyon ang gituohang mga kalainan sa mga kabtangan nga gideklara sa SALN ni Duterte.
Nahitabo kini human matino sa NBI ang gituohang kalainan tali sa kantidad sa mga propiedad nga gideklara sa SALN ug sa aktuwal nga assessed value niini.
