Giklaro sa Korte Suprema nga dili mahimong i-combine ang 20 porsyentong diskuwento alang sa senior citizens ug ang ubang promotional discounts nga gitanyag sa mga negosyo.
Sumala sa Supreme Court, kung ang produkto o serbisyo anaa sa promotional price, mahimong mopili ang mga senior citizen tali sa promotional discount ug sa 20 porsyentong diskuwento nga gitakda sa balaod. Ang ilang mapilian mahimong ibase kon hain ang makahatag kanila og mas dako nga matipid.
Nagsugod ang kaso sa reklamong gisang-at batok sa general manager sa usa ka hotel sa Bacolod City tungod sa giingong pagdumili sa paghatag og diskuwento sa duha ka senior citizen, nga giisip nga posibleng paglapas sa Republic Act No. 7432 o Senior Citizens Act.
Apan, sa desisyon sa Korte Suprema, gibasura ang kaso batok sa opisyal sa hotel ug gipahigawas siya sa kriminal nga tulubagon.
Ubos sa balaod, nga giusab pinaagi sa Expanded Senior Citizens Act of 2010, ang mga Pilipino nga nag-edad og 60 anyos pataas adunay katungod sa nagkalainlaing benepisyo ug pribilehiyo, lakip ang 20 porsyentong diskuwento sa pipila ka serbisyo sa mga hotel, restaurant ug recreation center.
