DAVAO CITY – Subling nagpahimangno ang Barangay Council sa Brgy. Tagurano alang sa mga turista nga adunay laraw nga mag-trekking sa maong Barangay kini human nga temporaryo nga gipasirad-an ang pipila ka suruyanan ug istraktura tungod sa ilegal nga pagtukod sulod sa Mt. Apo Natural Park nga walay igong dokumento.
Nasayran nga niadtong milabayng simana dihang nagkasinabot ang mga opisyales sa barangay, grupo sa mga indigenous peoples, ug mga ahensya sa gobyerno lakip na ang City Government of Davao alang sa pagpatuman sa Cease and Desist Order sa pipila ka mga suruyanan sa barangay nga nalakbit sa Strict Protection Zone sa Mt. Apo Natural Park ilawom sa Republic Act 11038 otherwise known as “National Integrated Protected Areas System kon NIPAS Act of 1992.
Gipaklaro sa barangay nga temporaryo lamang ang maong temporary closure hangtod nga i-lift kini sa PAMB ug DENR alang sa pag-proseso sa mga balaud aron ma-regulate ang regular nga trekking, hiking, camping, ug ubang outdoor activities.
Sumala pa sa barangay, ilang gipaningkamotan nga ma-legalize ug ma-regulate ang mga aktibidad sa taas nga bahin sa Brgy. Tagurano tungod sa pagpromotar sa katahom ug kalmado sa lugar, nakatabang sa mga lokal nga residente sa barangay nga mangita og panginabuhian alang mga pamilya, ug gisiguro nga mamentinar nga limpyo ug protektado ang lugar aron makonserba ang kahayupan ug kalasangan nga nagpuyo sa maong lugar.
via || Bombo LJF
