Gipasiugda ni Senator-judge Alan Peter Cayetano ang panginahanglan nga mahatagan og igo ug patas nga panahon ang depensa aron maandam ang ilang pag-atubang sa mga AMLC records sa impeachment trial batok kang Vice President Sara Duterte.
Nahisgotan kini human nangayo ang defense team og dugang panahon aron masusi ang mga dokumento sa Anti-Money Laundering Council o AMLC sa dili pa ang presentasyon ug cross-examination sa witness sa ahensya.
Matud ni Cayetano, wala man nangayo ang depensa og usa ka semana o usa ka bulan aron mangandam, kondili igo lamang nga panahon aron masusi ang mga dokumento. Busa, importante nga mapadayon ang balanse tali sa paspas nga dagan sa impeachment proceedings ug patas nga higayon alang sa duha ka panig.
Samtang, gipatin-aw ni Senator-judge Risa Hontiveros nga ang confidentiality provision ubos sa Anti-Money Laundering Act dili nagpasabot nga hingpit nang bawal sa AMLC ang paghatag og confidential information.
Sumala ni Hontiveros, ang maong probisyon nagtumong sa pagpugong sa pagpagawas sa confidential information, apan dili kini babag sa pagtuman sa subpoena nga giisyu sa usa ka tukmang korte, lakip na ang Impeachment Court.
Gipunting usab ni Hontiveros nga andam motestigo ang opisyal sa AMLC sa impeachment proceedings, busa ang iyang pag-atubang angay nga maapil sa opisyal nga rekord sa pagdungog.
