Gipresentar sa ika-32 nga adlaw sa impeachment trial ang duha ka property sa Davao City nga gipalit kuno ni Atty. Manases “Mans” Carpio, nga giingong wala motakdo sa mga deklarasyon sa SALN ni Vice President Sara Duterte.
Mitestigo atol sa hearing si Davao City Register of Deeds IV Atty. Kathy Florence Baldonado ug Island Garden City of Samal Deputy Register of Deeds III Atty. Marco Pineda bahin sa mga property records nga may kalabotan kang Carpio.
Sumala ni Baldonado, mipalit si Carpio kaniadtong 2024 og property sa Barrio Matina, Davao City nga nagkantidad og ₱6 milyon ug adunay gilapdon nga 379 square meters.
Gipunting ni Senate Impeachment Court Presiding Officer Francis “Chiz” Escudero nga wala niya makita ang maong property sa 2025 SALN ni Duterte.
Misupak ang defense lawyer nga si Atty. Lindon Bacquel ug mipasabot nga posible nga naapil ang property sa SALN tungod kay ang Matina Crossing nailhan usab isip Barangay 74-A, nga anaa sa deklarasyon ni Duterte.
Samtang, nagkanayon si Pineda nga mipalit si Carpio kaniadtong 2018 og property sa Matanos, Island Garden City of Samal nga nagkantidad og ₱3.453 milyon.
Apan, matud pa ni Pineda, walay deklarasyon sa SALN ni Duterte nga eksaktong motakdo sa impormasyon nga anaa sa Deed of Absolute Sale alang sa maong property.
Pasiugda usab ni Pineda nga usa lamang ka parcel of land ang nakatala sa maong titulo ug dili duha, nga nahimong bahin sa paghisgot sa mga dokumento ug deklarasyon sa SALN atol sa hearing.
