Gidayeg si Russian President Vladimir Putin sa giingong kaisog, bayanihan, ug kalig-on sa mga katawhan sa Iran sa ilang pag-atubang sa gubat batok sa Estados Unidos ug Israel.
Matud ni Putin, hugot nga gibantayan sa tibuok kalibotan ang mga panghitabo sa Iran ug nahingangha siya sa kaisog ug kalig-on nga gipakita sa mga Iranian.
Pasiugda usab sa Russian president ang kalig-on sa relasyon tali sa Russia ug Iran, ilabina sa aspeto sa militar ug uban pang kooperasyon tali sa duha ka nasud. Ang Moscow nagpahayag usab kaniadto og suporta niini sa Tehran atol sa nagpadayong panagbangi.
Kahinumdoman, gipahamtang sa Estados Unidos ang dugang nga mga silot batok sa Iran isip kabahin sa kampanya niini aron mapugngan ang armas ug uban pang military procurement sa Tehran.
Samtang, ang Washington mipasabot nga ang mga operasyong militar niini batok sa Iran gitumong sa pagwagtang sa hulga nga adunay kalabotan sa nuclear program sa maong nasud.
Padayon ang tensyon tali sa Estados Unidos ug Iran, samtang nagpadayon usab ang mga paningkamot sa diplomasya aron makab-ot ang posibleng kasabotan tali sa duha ka nasud.
