Makasinati og kalat-kalat nga pag-ulan ug thunderstorms ang pipila ka bahin sa Visayas ug Mindanao karong Biyernes, Oktubre 2, 2026 tungod sa trough o ikog sa Severe Tropical Storm Choi-Wan nga nagpabiling gawas sa Philippine Area of Responsibility.
Gilauman ang mapanganuron nga kalangitan nga adunay tsansa nga pat-an pat-ak nga pag ulan ug pagpanaludog sa Western Visayas, Negros Island Region, Central Visayas ug Mindanao tungod sa trough sa bagyo.
Samtang, partly cloudy ngadto sa cloudy nga kawanangan uban ang isolated rain showers o thunderstorms ang masinati sa ubang bahin sa Visayas.
Sa Metro Manila ug ubang bahin sa Luzon, kasagarang maayong panahon ang gilauman, apan posible gihapon ang isolated rain showers o thunderstorms tungod sa localized thunderstorms.
Matud ni PAGASA weather specialist Obet Badrina, gamay ang posibilidad nga mosulod sa PAR ang Choi-Wan.
Sa pinakabag-ong monitoring, nahimutang ang Severe Tropical Storm Choi-Wan sa 2,495 kilometros silangan sa Northern Luzon, nga adunay kusog sa hangin nga 95 kilometros matag oras duol sa sentro ug pagbugso nga moabot sa 115 kilometros matag oras.
Ang bagyo nagalihok paingon sa west-northwest sa gikusgon nga 10 kilometros matag oras ug gilauman nga mopadayon kini sa paglihok paingon sa amihanang direksyon, padulong sa bahin sa Japan hangtod karong weekend.
Sa kasamtangan, nagpadayon ang pagkusog sa Choi-Wan ug posibleng makaabot sa typhoon category.
Padayon nga gibantayan sa PAGASA ang lihok ug kalamboan sa bagyo, ilabina ang posibleng epekto sa trough niini sa panahon sa Visayas ug Mindanao.
