DAVAO CITY – Gipakansela ni kanhi pangulong Rodrigo Duterte ang Hakbang ng Maisug Central Luzon rally nga ipahigayon unta sa probinsya sa Bulacan, kagahapon, Abril 28.
Gikumpirma mismo ni Verdel Delos Santos, nga usa sa mga organizers sa maong panagtapok ang sumala pa pagpaharang kanila sa tag-iya sa luna diin ipahigayon ang prayer rally.
Nasayran nga wala sila natagaan og permit sa lokal nga panggamhanan sa Bustos, Bulacan aron maglusad og dakong rally.
Gipabaklas sab sa nagpailang abogado ang stage ug gipapahawa sab ang technical crew sa venue.
Atol sab sa pagbabag, gipabutangan og dagkong truck ang venue aron dili na pasudlan sa katawhan.
Giharangan sab sa kapulisan ang mga dalan paingon sa venue. Gikadismaya sa mga supporters ang nahitabong kanselasyon gumikan sumala pa sa pagpugong ug pagbabag kanila nga musalmot sa maong kalihukan.
Subay sa taho sa kapulisan, nagpahigayon ang usa ka panagpulong ang tag-iya sa luna ug ang legal counsel niini uban ang acting police chief sa Bustos PNP nga si Police Maj. Michael Santos, ug gipasabot sa mga organizers ang ilang baruganan nga dili ipagamit ang iyang luna alang sa maong rally.
Sumala sab sa mga organizers, mismong mga personahe sa Malacanang ang nagbahad kanila nga hunungon ang pagpahigayon sa prayer rally.
Gibarugan sa mga organizers nga wala sila’y gisupak nga balaod ug anaa kini tanan sa saktong dokumentasyon.
Gipasanginlan sa mga organizers ang administrasyon ni Pangulong Bongbong Marcos nga nang-harass kanila.
Hinuon, mismo ang kanhi pangulo ang napugos nga ipakansela ang maong prayer rally aron malikayan ang kagubot.
via || Bombo LJF
