Gipalig-on sa Department of Agriculture o DA ang koordinasyon sa mga kaubang ahensya niini aron maatubang ang hulga sa mas grabeng El Niño nga mahimong hinungdan sa hulaw ug pagkunhod sa produksyon sa agrikultura sa nasod.
Sumala kang DA Secretary Francisco Tiu Laurel Jr., gimandoan niya ang National Food Authority o NFA nga gamiton ang dakong bahin sa badyet niini alang sa agresibong pagpamalit ug pagtipig sa humay ug bugas aron mapuno ang mga bodega sa ahensya.
Gibutyag sa kalihim nga anaa na lamang sa 40 porsyento ang nahibiling ani sa nasod nga kinahanglan mapalit sa NFA sa dili pa matapos ang panahon sa pag-ani.
Gipaniguro usab sa DA nga puno ang mga cold storage facility alang sa ubang produktong pang-agrikultura, samtang gipadayon ang pag-apod-apod sa solar pump irrigation systems sa mga lugar nga adunay magamit pang tinubdan sa tubig aron mamenosan ang epekto sa hulaw.
Bisan pa sa hulga sa El Niño, nagpabilin ang pagsalig sa DA nga dili magkakulang sa kinatibuk-an ang mga nag-unang panginahanglanon sa merkado.
Matud ni Laurel, ang pag-angkat og bugas gikan sa gawas sa nasod mahimong kataposang kapilian lamang sa gobyerno kung adunay kakulang sa lokal nga produksyon.
Sa bahin sa pondo, nakadawat na ang DA og P2.6 bilyon gikan sa gisugyot nga P45 bilyon nga supplemental budget alang sa dali nga pagpatuman sa mga lakang aron mamenosan ang epekto sa krisis ug El Niño.
Gilauman usab sa ahensya ang dugang nga P10 bilyon alang sa solar irrigation, mga bomba sa tubig ug bio-fertilizers, lakip ang pondo alang sa Presidential Assistance to Farmers and Fisherfolks isip suporta sa mga mag-uuma ug mangingisda.
Sa pagkakaron, gipadayon sa DA ang pagpangandam ug pagpalig-on sa mga programa sa irigasyon, pagtipig sa suplay sa pagkaon ug pagtabang sa mga mag-uuma ug mangingisda aron mamenosan ang posibleng epekto sa El Niño sa produksyon sa agrikultura ug suplay sa mga nag-unang palaliton.
