Gipahayag sa Department of Justice o DOJ ang kabalaka sa minilyon ka mga indibidwal nga naggamit og peke nga Person with Disability o PWD ID sa nasud.
Sumala kang Chief State Counsel Dennis Arvin Chan, gikabalak-an sa kagawaran ang datos nga nadawat gikan sa National Council on Disability Affairs o NCDA.
Kini human nadiskobrehan nga mokabat sa kapin walo ka milyon ka mga tawo ang naggamit og peke nga PWD ID sa Pilipinas, itandi sa 2.8 milyon lamang ka mga rehistradong persons with disabilities.
Tungod niini, gibana-bana nga mokabat sa unom ka milyon ang kalainan tali sa gidaghanon sa mga giingong tiggamit og peke nga PWD ID ug sa tinuod nga mga rehistradong benepisyaryo.
Samtang, nagpahimangno ang Department of Justice sa tanang indibidwal nga nalambigit o naggamit sa napamatud-ang peke nga PWD card.
Matod pa ni Chan, mahimong manubag sila ubos sa balaod ug posibleng pasakaan og mga kaso sama sa falsification of public documents, estafa, ug graft and corruption, depende sa ilang nahimong kalapasan ug sa mga ebidensiyang motumaw.
Alang sa mga negosyante, gitambagan sila sa DOJ nga moduol sa ilang lokal nga panggamhanan aron ipasusi ug mapamatud-an ang pagkalehitimo sa PWD ID kon adunay pagduda nga peke kini.
| via Bombo Ray Ann Martinez
