Gipahibalo ni U.S. Defense Secretary of State Marco Rubio ang pagpahamtang sa Estados Unidos og sanctions batok sa International Criminal Court o ICC, nga nagtinguha nga pugngan ang mga transaksiyon niini ug limitahan ang mga kahinguhaan ug abilidad sa korte sa pagpadagan sa operasyon.
Sumala kang Rubio, dili tugotan ni U.S. President Donald Trump nga husayon sa iyang gihulagway nga “pekeng korte” ang mga Amerikano. Dugang pa niya, gipatuman ang mga silot aron mahatagan ang ICC ug ang mga miyembrong nasud niini og higayon nga tubagon ang mga kabalaka ug gipangayo sa Estados Unidos.
Dugay nang gisupak sa Washington ang pag-isyu sa ICC og warrant of arrest batok kang Israeli Prime Minister Benjamin Netanyahu ug pipila ka opisyal sa Israel, ingon man ang mga imbestigasyon sa korte kalabot sa mga aksyon sa mga sundalong Amerikano sa Afghanistan. Una nang gipahamtangan sa Estados Unidos og sanctions ang 17 ka mga huwes ug opisyal sa ICC kaniadtong Agosto.
Samtang, gikondena sa ICC ang maong lakang sa Estados Unidos. Sumala kang ICC President Tomoko Akane, dili madawat ang pagpahamtang og sanctions tungod kay independente ug subay sa balaod ang ilang mga imbestigasyon.
Isip huwes usab sa ICC, gipasiugda ni Akane nga walay politikal nga motibo ang ilang mga imbestigasyon ug gibase kini sa ilang mandato ug sa mga ebidensiyang anaa kanila. Giisip usab niya ang sanctions isip pag-atake sa korte ug sa mga biktima sa pagpang-abuso nga nangitag hustisya.
Bisan pa sa hulga sa sanctions, gipadayag ni Akane nga dili sila magpadaog sa maong pagpamugos ug magpadayon sa ilang trabaho isip usa ka independente nga internasyonal nga hudisyal nga institusyon.
Kahinumdoman nga gipahamtangan sa Estados Unidos og sanctions ang ICC tungod sa mga kaso ug imbestigasyon nga naglakip sa mga Amerikano, bisan dili miyembro ang Estados Unidos sa maong korte.
Video Courtesy: ICC and US Government
