DAVAO CITY – Gibutyag sa Department of Public Works and Highways 11 (DPWH 11) spokesperson Dean Ortiz nga dakong porsyento sa mga proyekto sa DPWH dinhi sa dakbayan sa Davao sukad niadtong 2020 ug hangtod sa naidtong miaging tuig ang nasuspende gumikan sa Road Right-Of-Way (RROW).
Sumala pa sa opisyal nga ang ahensya nagpadayon gihapon sa paghulat sa mga kasabutan ngadto sa mga tag-iya sa mga propedad nga naapektuhan sa mga proyekto ilabi na sa mga kadalanan.
Gipresenta ni Ortiz atol sa pagtambong niini sa gipahigayon nga special session sa City Council kagahapong adlaw nga niadtong miaging tuig nga regular infrastructure program, hangtod February 29, karong tuiga, adunay kinatibuk-an nga 31 ka mga proyekto dinhi sa syudad kung diin 12 sa First District, 13 sa Second District ug unom sa Third District.
Kini sumala pa nga mga proyekto ang adunay contract amount nga mokabat sa P4.12 billion.
Samtang niadtong 2022 regular infrastructure program, ang DPWH 11 ang adunay kinatibuk-an nga 52 ka mga proyekto nga nagkantidad ug P9.89 billion.
Ug kini nga mga proyekto, walo niini ang nagapadayon hangtod karon, samatang 27 ang suspendido tungod sa isyu sa Road Right Of Way, samtang 17 ang nakompleto na nga adunay kinatibuk-an nga 78.53 percent nga kahumanan sa mga proyekto.
Alang sa 2020 infrastructure regular program, ang maong ahensya ang adunay 72 ka mga proyekto nga nagkantidad ug P12.27 billion kung diin duha niini ang kasamatangang ginatrabaho, 17 ang suspendido gumikan sab sa RROW, ug 53 ang nakompleto na.
