Gilauman ni Senate President Sherwin Gatchalian nga mahimong makapagawas na og desisyon ang Senate Impeachment Court sa impeachment case batok kang Vice President Sara Duterte sa tunga-tunga hangtod sa kataposan sa Nobyembre ning tuiga.
Sa usa ka interbyu, gipahayag ni Gatchalian nga tumong nilang mahuman ang pagtaral ug makapagawas og desisyon sa dili pa matapos ang Nobyembre, bisan pa nga mahimo pang mausab ang iskedyul depende sa dagan sa mga pagdungog.
Sumala pa sa Senate President, gilauman nga mahuman karong semanaha o sa sunod semana ang presentasyon sa prosecution alang sa Article II, nga naglangkob sa alegasyon sa unexplained wealth, sa dili pa mosunod ang Article IV, nga may kalabotan sa bribery, ug dayon ang presentasyon sa depensa.
Naglaom usab si Gatchalian nga mas paspas na ang presentasyon sa depensa tungod kay naanad na ang mga partido ug ang impeachment court sa proseso sa pagtaral.
Gibanabana niya nga mahimong molungtad og 30 hangtod 45 ka adlaw ang presentasyon sa depensa. Apan giklaro niya nga personal nga banabana lamang kini ug mahimo pang mausab depende sa gidaghanon sa mga testigong ipresentar ug sa mga kausaban sa iskedyul.
Kahinumduman nga una nang gipahayag ni Gatchalian ang iyang tumong nga mahuman ang impeachment proceedings ug makabaton og desisyon sa dili pa ang Pasko. Samtang, matud ni Senate Impeachment Court spokesperson Atty. Reginald Tongol, mahimong moabot hangtod Disyembre 16 ang pagpagawas sa desisyon kung gamiton sa depensa ang tibuok 30 ka adlaw nga gitagana alang sa presentasyon sa ilang mga ebidensya.
Sa pagkakaron, magdepende gihapon ang petsa sa pagpagawas sa desisyon sa aktuwal nga dagan sa mga pagdungog ug sa gidugayon sa presentasyon sa duha ka panig.
