DAVAO CITY – Mukabat sa 300 ka mga personahe ang ipakatap sa Davao City Traffic and Transport Management Office panahon sa Kwaresma ning tuiga. Sumala ni Leonardo Pamplona, CTTMO Acting Division Head, lakip na niini ang mga personahe sa satellite offices sa Panacan, Bunawan, Calinan, Mintal ug Toril.
Kadaghanan sa mga personahe ang ipangmuntar sa mga simbahan nga dagsaon sa mga deboto. Pagpaklaro pa sa buhatan nga walay road closures nga ipatuman sa dakbayan karong Holy Week.
Sa laing bahin, gikabutyag sa head sa Davao City Overland Transport Terminal nga si Aiza Usop nga nagpadayon ang pakig-alayon niini sa LTFRB 11 alang sa paghatag og special permit sa mga bus nga mubyahe karong Holy Week.
Sa pagkakaron, nakaisyu na og LTFRB 11 og 21 ka mga special permits alang sa mga bus companies nga muserbisyo sa mga ruta nga gilaumang manginahanglan og dugang nga mga transportasyon alang sa laumang influx sa mga pasahero karong Kwaresma sunod semana sama sa Davao City padulong Tandag, Maragusan, Malita ug New Bataan.
Sumala ni Usop, lauman nga muabot sa 1,000-1,500 ka mga bus trips matag adlaw nga makaakomodar og 50,000-75,000 ka mga pasahero sugod sunod simana.
via || Bombo LJF
