Gihangyo ni Palace Press Officer Usec. Claire Castro ang publiko nga mouban sa pag-ampo kang Atty. Mans Carpio aron mogawas ang kamatuoran sa mga isyung giatubang sa iyang asawa nga si Vice President Sara Duterte.
Sumala kang Castro, walay gipili ang administrasyon ni Pangulong Ferdinand Marcos Jr. sa pag-imbestigar sa mga giingong iregularidad, bisan pa kon ang nalambigit niini mga paryente, higala o kaalyado.
Dugang pa sa opisyal, ang bisan kinsang tawo nga adunay ebidensiyang naglambigit kanila sa posibleng anomalya angay imbestigahan. Apan, kung walay ebidensiya batok sa mga nadamay lamang, aduna silay higayon nga malimpyohan ang ilang mga ngalan.
Ang pahayag ni Castro gisundan sa paghulagway ni Carpio sa iyang kaugalingon isip collateral damage o nadamay lamang sa impeachment case batok kang Vice President Sara Duterte.
“Sabayan natin si Mans Carpio sa pagdarasal para sa katotohanan,” matud ni Castro.
Giawhag usab ni Castro ang publiko nga susihon ang mga ebidensiyang gipresenta aron sila mismo makahimo sa pagtimbang-timbang kung unsa ang kamatuoran ug unsa ang dili.
