DAVAO CITY – Gimugna karon sa DSWD 11 ang task force nga mututok sa imbestigasyon sa mga nasayrang pagpangkaltas sa mga social benefits sa mga benepisyaryo sa bisan unsang programa sa buhatan.
Sumala pa ni DSWD XI Regional Director Atty. Vanessa Goc-ong, nagpadayon karon ang imbestigasyon sa buhatan mahitungod sa maong mga reklamo sa pipila ka mga benepisyaryo nga nakadawat og kinaltasan inay kinatibuk-ang kantidad sa mga pinansyal nga hinabang.
Nag-awhag karon ang buhatan nga sutaon una ang kantidad nga gihatag atol sa pag-release, ug wala sab dapat bahin ang si kinsa man ang maghatag niini maski myembro pa kini sa LGU.
Gikatakdang ipasa ngadto sa kauluhan ang resulta sa imbestigasyon sa maong ilegal nga binuhatan.
Sa mga dunay kasayuran mahitungod sa naghitak karon nga istilo sa pagpangikil sa ayuda, mamahimo kining idangop sa social media page sa DSWD Davao o dili kaha sa ilang hotline number nga (632) 931-8101.
Sa laing bahin, nakatunol ang DSWD og anaa sa 57.4 million pesos nga hinabang sa mga naapektuhan sa magnitude 6.8 nga linog sa Davao Occidental niadtong Nobyembre 18 diin natunolan niini ang libuan ka mga pamilya sa Rehiyon Onse ug Dose.
via || Bombo LJF
