DAVAO CITY – Gisang-at na ang kasong murder ug malicious mischief batok sa mga nalambigit sa nahitabong pagbusikad sa Purok 31, Roman Diaz Street, Calinan Poblacion, Davao City, niadtong Agosto 7 sa gabii.
Gikanayon ni DCPO Director PCol. Alberto Lupaz nga nagpabilin sa kustodiya ang usa sa mga suspek nga nagbilin og bomba atbang sa restobar nga si Roel Galleon Coquilla, samtang nagpabiling gawasnon ang mastermind nga giila karong si Mcfrel Dacalos Encarnacion.
Dugang pa sa direktor sa Pulis Dabaw, kumpirmado ang mga impormasyon nga nasigpat gikan sa saksi sa maong krimen nga sumala pa, usa kini ka crime of passion gumikan sa pagpangsina sa mastermind ngadto sa ex-girlfriend nga tag-iya sa restobar.
Una nang gikabutyag nga dunay bahad sa kinabuhi ang iyang uyab nga babaye nga nadawat gikan sa mastermind una pa man nahitabo ang maong pagpamusikad.
Nakumpiska sab sa Tagum City ang kotse nga gigamit nga gipa-renta sa gikarelasyon karon sa main suspect.
Nadiskubrehan nga gama sa pulbura ug dili IED ang nibusikad gawas atbang sa Emragila Restobar niadtong gabhiona.
Kahinumduman nga atol sa insidente, nakabsan sa kinabuhi ang usa sa tulo ka mga biktima samtang duha niini ang nagpaalim sa ospital.
Kahinumdumang naghatag og 24 oras ang DCPO aron musurender ang main suspek apan wala kini nagpakita sa kapulisan.
via || Bombo LJF
