DAVAO CITY – Mutabang ang Police Regional Office 11 sa mga lakang nga pagahimoon sa Davao City Police Office alang sa nagpadayong imbestigasyon sa nahitabong pagbusikad sa Roman Diaz St., Barangay Calinan Poblacion, Calinan, ning dakbayan niadtong Lunes sa gabii.
Gikanayon ni PRO 11 spokesperson PMaj. Catherine dela Rey, gawas sa standard operating procedures nga ginalihok sa DCPO alang sa pagkasikop sa mastermind sa insidente, nagtabang sab ang Patrol Rehiyon Onse sa Explosive Ordnance Disposal Unit sa DCPO alang sa pagsusi sa nibuto nga explosibo ug ingon man nagalusad og information campaign ang PRO 11 sa mga komunidad mahitungod sa culture of security.
Nagpahibalo ang opisyal nga dili muduol dayon sa mga kadudadudahang mga gamit ug inay nga guniton, manawag og tabang sa mga hingtungdang ahensya aron masayran kon duna kini unod nga explosibo.
Ning kasamtangangan, gikustodiya na sa Bunawan Police ang usa sa mga suspek nga nagbilin og cellophane nga dunay pabuto atbang sa usa ka resto bar sa Calinan.
Samtang magpahigayon og hot pursuit operation ang DCPO ug PRO 11 alang sa pagkasikop sa ex-boyfriend sa naangol nga tag-iya sa maong establisyemento, nga gitutukan karong mastermind sa pagpamusikad.
Gipaklaro sab sa PRO 11 nga dili akto sa terorismo ang nahitabong pagbusikad, apan nagmotibo kini nga usa ka crime of passion.
via || Bombo LJF
