Nagpasidaan ang Department of Migrant Workers sa mga Overseas Filipino Worker (OFW) sa Middle East, ilabina sa Saudi Arabia, nga mag-amping sa pagpaambit og impormasyon sa social media taliwala sa nagpadayong tensiyon sa rehiyon.
Subay kini sa gikatahong pag-atake sa King Khalid International Airport kaniadtong Oktubre 10, 2026, nga nakapukaw sa kabalaka bahin sa kaluwasan sa mga Pilipinong nagpuyo ug nagtrabaho sa maong nasud.
Gipasiugda ni DMW Secretary Hans Leo J. Cacdac nga hugot ang mga protocol sa Saudi Arabia batok sa pagpakaylap sa sayop o wala pa makumpirmang impormasyon.
Tungod niini, gitambagan sa kalihim ang mga OFW nga likayan ang pagpakaylap sa mga espekulasyon, dili pa mapamatud-ang mga balita ug personal nga opinyon nga mahimong makalapas sa mga balaod sa maong nasod ug makapameligro sa ilang trabaho ug pagpabilin didto.
Nagpasidaan usab ang DMW nga ang paglapas sa maong mga balaod mahimong moresulta sa bug-at nga silot, lakip ang pagkabilanggo o deportasyon.
Busa, giawhag sa departamento ang mga Pilipinong mamumuo nga mosalig lamang sa opisyal ug kasaligan nga mga tinubdan alang sa tukmang impormasyon kabahin sa kahimtang sa seguridad sa Middle East.
