Gidepensahan sa National Food Authority o NFA ang pag-angkat og bugas gikan sa ubang nasod, nga giingong makatabang sa pagpugong sa posibleng kakulangon sa suplay sa Pilipinas.
Sumala kang NFA Administrator Larry Lacson, ang plano sa pag-import sa bugas giandam ug gipasiugda sa mga pribadong grupo sa rice industry stakeholders, ug dili direktang proyekto sa gobyerno.
Giklaro usab ni Lacson nga wala silay direktang papel sa maong plano, wala’y importation permit nga giproseso pinaagi sa NFA, ug dili ang ahensiya ang nag-import sa maong mga bugas.
Kahinumdoman nga gipahibalo sa Philippine Rice Industry Stakeholders Movement o PRISM kaniadtong miaging semana ang pagpirma nila og kasabutan uban sa USA Rice aron tugotan ang pagpasulod niini gikan sa Estados Unidos sugod sa 2027.
Kabahin sa maong kasabotan ang pagpalapad sa tinubdan sa suplay sa bugas sa nasud. Ubos sa Rice Tariffication Law o Republic Act No. 11203, gitugotan ang pribadong sektor nga mag-import og rice supplies, samtang ang NFA nagpunting sa pagdumala sa buffer stock alang sa mga emerhensiya ug kalamidad.
Bisan pa niini, nagpabiling hagit ang pagbalanse sa panginahanglan sa mga konsumidor alang sa igo ug makaya nga presyo sa bigas ug ang pagpanalipod sa panginabuhian sa mga lokal nga mag-uuma batok sa kompetisyon gikan sa imported nga produkto.
