Gikondena ni Atty. Sheila Sison, lead defense counsel ni Vice President Sara Duterte, ang pahayag ni House lead prosecutor Gerville Luistro nga aduna pay laing plataporma ang depensa aron ipahayag ang baruganan sa Bise Presidente, ug gihulagway kini nga “unbelievable and unacceptable.”
Sumala kang Sison, dili makatarunganong isulti sa respondent nga mahimo na lamang niyang gamiton ang laing plataporma human ipresentar sa prosekusyon sulod sa 38 ka adlaw ang mga testigo ug dokumento nga, sumala sa depensa, posibleng makadaot sa reputasyon ni Duterte.
Gipunting sa abogado nga dili igo nga rason ang interes sa publiko ug ang pagpadali sa husay aron hatagan og katarungan ang pag-withdraw sa prosekusyon sa tulo ka articles of impeachment, ilabina human mapresentar ang mga alegasyon ug ebidensiya batok sa Bise Presidente.
Tungod niini, nagpahayag si Sison nga angay ibasura ang tibuok impeachment case ug ang mga articles of impeachment kung dili dawaton sa impeachment court ang mga ebidensiyang gipresentar o gitanyag sa prosekusyon, lakip ang nahibiling Article II.
Giklaro usab ni Sison nga ang gikatakdang pagpadayon sa mga pagdungog sa Nobyembre 9, 10, 11 ug sa mosunod pang mga adlaw dili angay isipon nga kumpirmasyon nga mopadayon gayud ang pahusay. Magdepende gihapon kini sa desisyon sa impeachment court bahin sa pagdawat sa mga ebidensiya sa prosekusyon.
Dugang pa sa abogado, kung dili dawaton sa korte ang maong mga ebidensiya, ang angay nga lakang mao ang pagbasura sa tibuok kaso. Bisan pa niini, giklaro ni Sison nga ang depensa magpadayon subay sa estratehiyang ilang giisip nga angay aron mapahayag ang ilang punto.
