DAVAO CITY – Gikumpirma sa Davao City Prosecutors Office nga nadissmiss na ang kasong gipasaka sa Civil Aviation Authority of the Philippines – Davao batok sa vlogger nga nakaipsot sa abyon sa Davao International Airport gamit ang peke nga identification ug walay boarding pass.
Gipakanaog ang maong desisiyon sa piskalya kaniadtong Marso 23 ning tuiga, diin nagkanayong walay nakitang probable cause ang gipasakang kaso.
Sumala pa sa imbestigador sa Davao Airport Police, nahitabo ang maong insidente kaniadtong Oktubre 15, 2022.
Subay sa imbestigasyon, igo lamang naghatud ang gireklamong vlogger sa iyahang higala nga naghupot sa boarding pass paingon Maynila.
Wala matud sab gigamit sa maong vlogger ang mga nasinatian sulod sa airport.
Una nang nangayo og pasaylo ang vlogger sa mga tigdumala sa airport gumikan sa perwisyong hatud sa maong insidente nga nagresulta sa pagkadilatar sa gisakyang flight.
Suspendido sab ang mga empleyado sa airline company nga nalambigit niini.
via || Bombo LJF
