Gisugyot sa Davao City Council nga doblehon ngadto sa ₱2 milyon ang pinakadakong kantidad nga mahimong mahulaman sa mga accredited cooperatives sa siyudad ubos sa Davao City Sustainable Livelihood and Entrepreneurship Program o DCSLEP.
Matud ni Councilor Al Ryan Alejandre, chairperson sa Committee on Cooperative and Development, and on Arts and Culture, gihisgutan ug gipahapsay na ang gisugyot nga amendment uban sa City Cooperative Office, City Agriculture Office ug City Social Welfare and Development Office.
Nakapasar na usab sa unang pagbasa sa konseho ang maong sugyot niadtong miaging semana.Gikan sa kasamtangang loanable amount nga ₱1 milyon, gitinguhang ipataas ngadto sa ₱2 milyon ang pautang nga mahimong makuha sa mga kooperatiba, nga walay interes sulod sa duha hangtod tulo ka tuig.
Sumala ni Alejandre, makatabang kini sa mga kooperatiba nga nanginahanglan og dugang kapital aron mapalapdan ang ilang negosyo ug operasyon. Gibutyag usab sa konsehal nga adunay mga kooperatiba nga nakahulam na ubos sa maong programa sa miaging tuig ug karong tuiga, ug nakabayad sa ilang mga obligasyon sa hustong panahon.
Sa pagkakaron, nagpadayon ang proseso sa gisugyot nga amendment sa konseho. Kon maaprobahan, mas dako na ang mahimong magamit nga pautang sa mga kwalipikadong kooperatiba aron masuportahan ang pagpalambo sa ilang panginabuhian ug negosyo.
