Pormal nang giablihan ni Presidente Ferdinand Marcos Jr. ang ika-49 nga ASEAN Leaders Summit and Related Summits niadtong Nobyembre 15 sa Philippine International Convention Center (PICC) sa Pasay City, isip kabahin sa pagpangulo sa Pilipinas sa ASEAN karong 2026.
Sa iyang pakigpulong, gipasiugda ni Marcos ang panaghiusa ug hiniusang responsibilidad sa mga miyembrong nasud sa pag-atubang sa mga hagit sa rehiyon, lakip ang tensiyon sa South China Sea, krisis sa Myanmar, mga gubat sa Middle East ug Ukraine, seguridad sa enerhiya ug transnational crimes.
Usa sa mga highlight sa summit ang pagsakay sa mga lider sa tricycle isip pagpakita sa lokal nga kultura. Gilusad usab ang bag-ong bandila ug sagisag sa ASEAN human sa pagdawat sa Timor-Leste isip ika-11 nga miyembro sa organisasyon. Personal kining gitugyan ni Marcos ngadto kang ASEAN Secretary-General Dr. Kao Kim Hourn.
Gigamit usab sa Pilipinas ang maong panagtigom aron ipaila sa mga delegado ang Filipino culture, tradisyon, pagkaon,ug mga destinasyon sa turismo. Gipakita kini pinaagi sa mga cultural presentation ug lokal nga produkto, samtang giandam ang International Media Center sa mga mamamahayag nga nag-cover sa summit.
Gipangunahan usab ni Marcos ang pagtugyan sa Digital Economy Framework Agreement ngadto kang Dr. Kao Kim Hourn aron mapalig-on ang digital cooperation sa rehiyon.
Samtang, giaprobahan sa ASEAN ang konsepto ug terms of reference sa pagtukod sa ASEAN Maritime Center nga ibase sa Pilipinas. Giila usab isip sectoral body sa organisasyon ang ASEAN Coast Guard Forum aron mapalambo ang koordinasyon sa maritime law enforcement agencies.
Gipunting usab sa mga langyawng kalihim ang panginahanglan nga undangon ang kapintasan sa Myanmar, masiguro ang walay babag nga humanitarian aid, ipahigayon ang inklusibong dayalogo ug buhian ang mga gidakop.
Sa bahin sa ekonomiya, giingon ni Ayala Corporation Chair Jaime Augusto Zobel de Ayala nga oportunidad alang sa ASEAN ang kompetisyon sa Estados Unidos ug China aron makadani og pamuhunan. Nahuman na usab ang negosasyon alang sa free trade agreement tali sa ASEAN ug Canada.
Magpadayon ang summit hangtod Nobyembre 17, 2026 aron hisgotan ang mga prayoridad sa rehiyon ug palig-onon ang kooperasyon sa mga miyembrong nasud.
