Gipahayag sa House prosecution panel nga wala na kini nagkinahanglan og dugang nga ebidensiya aron suportahan ang alegasyon sa unexplained wealth batok kang Vice President Sara Duterte, human pormal nang nahuman ang presentasyon sa ilang kaso sa impeachment trial.
Matud ni Atty. Benjamin “Jay” Tolosa Jr., legal spokesperson ug private prosecutor sa panel, igo na ang mga dokumento ug ebidensiyang ilang gipresentar aron ipakita ang giingong kapin P800 milyong kantidad sa mga kabtangan ug yaman nga wala maideklara ug gilangkit sa Bise Presidente ug sa iyang bana nga si Atty. Manases “Mans” Carpio.
Gikan ang maong kantidad sa forensic examination ni prosecution witness Alexander Cabrera sa bank records, tax documents, corporate records ug Statements of Assets, Liabilities and Net Worth o SALN sa magtiayong Duterte-Carpio gikan 2022 hangtod 2025. Sumala kang Tolosa, panahon na karon sa depensa nga tubagon ug pabulaanan ang mga alegasyon.
Samtang, giingon ni House Deputy Speaker ug Iloilo Representative Janette Garin nga si Duterte mismo ang labing angay nga makahatag og katin-awan sa mga isyu. Gidasig niya ang Bise Presidente nga gamiton ang higayon sa impeachment court aron personal nga ipresentar ang iyang panig atubangan sa mga senator-judges.
Sa unang semana sa presentasyon sa depensa, unom ka testigo ang nahatagan og higayon nga mosaksi, samtang 18 sa unang 24 ka testigo nga gilista ang wala na ipadayon. Matud ni Atty. Michael Poa, tigpamaba sa depensa, aduna pa silay walo hangtod napulo ka testigo nga gilauman nilang ipresentar sa dili pa mahuman ang ilang depensa.
