Gipahibalo ni National Food Authority (NFA) Administrator Larry Lacson sa eksklusibong pakighinabi sa Bombo Radyo nga adunay igong pondo ang ahensya alang sa gipataas nga presyo sa pagpalit sa humay gikan sa mga lokal nga mag-uuma.
Karon, P30 na matag kilo ang presyo sa limpyo ug uga nga humay, samtang adunay lahi usab nga presyo alang sa basa nga humay.Matod ni Lacson, mokabat sa P9 bilyon ang gigahin nga pondo ubos sa General Appropriations Act, lakip ang dugang nga P10 bilyon gikan sa Department of Agriculture aron masuportahan ang maong programa.
Gipasabot niya nga P27 lamang matag kilo ang unang gitakdang presyo, apan tungod kay gamay ra ang mga mag-uuma nga namaligya sa maong kantidad, gikinahanglan nga ipataas kini aron mas mahimong mapuslanon ug madani ang mga mag-uuma sa pagbaligya sa ilang ani.
Matod pa ni Lacson, usa sa mga nag-unang hinungdan sa maong lakang mao ang pagtabang sa mga mag-uuma nga mahupay ang ilang kalisod sa pagpanguma tungod sa padayon nga pagsaka sa presyo sa abono ug gasolina.
Tumong niini nga masiguro nga mabawi sa mga mag-uuma ang ilang mga nagasto bisan pa sa mga kausaban sa merkado.Bisan pa nga gipatuman na ang pagtaas sa presyo, miangkon si Lacson nga dili pa nila matino ang eksaktong gidaghanon sa humay nga mahimong mahatod ug mabaligya sa mga mag-uuma sa pagkakaron.
Bisan pa niini, tumong sa NFA nga makapalit og hangtod sa 500,000 metric tons nga humay aron masiguro ang igong gidaghanon alang sa nasudnong pagpamalit ug maporma ang gikinahanglang reserbang suplay sa nasud.
Giawhag usab nila ang mga mag-uuma nga dad-on ang ilang mga ani ngadto sa mga giandam nga bodega sa ahensya.
