Nagkanayon si United States President Donald Trump nga gamay na ang posibilidad nga ipadayon pag-usab ang gubat batok sa Iran, basta magpadayon ang negosasyon tali sa duha ka nasud.
Gipahayag ni Trump nga grabe na kuno ang kadaot nga nahimo sa US military sa Iran. Apan wala niya gisalikway ang posibilidad sa pagbalik sa pag-atake kung mapakyas ang Iran sa pagdawat sa kasabotan nga gipangayo sa Washington.
Kahinumdoman nga sa miaging mga semana, gihulga ni Trump nga ipadayon ang mga pag-atake, samtang adunay mga report nga posibleng mobalik ang panagsangka human sa midterm elections.Giangkon usab ni Trump nga posibleng nakaapekto sa kapildihan sa iyang Republican Party sa eleksiyon ang pagsupak sa publiko sa gubat batok sa Iran.
Dugang pa ni Trump, ang giangkon niyang 301 porsiyentong inflation ug nagkagrabeng kahimtang sa ekonomiya sa Iran mahimong makapugos sa mga lider niini nga modawat sa kasabotan sa kalinaw.
Samtang, miingon si Iranian Foreign Minister Abbas Araghchi nga temporaryong mihunong ang mga panaghisgot sa kalinaw samtang gisusi pa ang epekto sa kadaugan sa Democratic Party sa eleksiyon sa Estados Unidos.
Padayon usab nga gibabagan sa Iran ang bahin sa agianan sa mga barko sa Strait of Hormuz, nga nakaapekto sa suplay sa lana gikan sa Gulf ug nakatampo sa pagsaka sa presyo sa gasolina sa tibuok kalibutan.
