DAVAO CITY- Anaa lamang sa 37 porsyento gikan sa 182 ka mga barangay sa dakbayan sa Davao ang nagpatuman og waste management. Kini sumala sa City Environment and Natural Resources Office (CENRO).
Sumala ni Orly Limpangog, CENRO INFORMATION EDUCATION CAMPAIGN UNIT FOCAL PERSON, nga pipila lamang ka barangay sa downtown area ang malampusong nagpatuman sa proper waste management kana tungod aduna silay kaugalingon nga recycling storage box.
Sumala sa CENRO, kakulangon matud pa sa espasyo ug pondo ang usa sa mga rason nganong pipila lamang ka barangay ang gaimplementar sa maong Ordinansa.
Ilalom sa SWM Ordinance of 2009 sa Davao City, ang tanang barangay obligado nga adunay kaugalingong materials recovery facility diin ang mga basura ilain-lain aron i-recycle o alang sa pag-compost. Ang CENRO ang mokolekta lamang sa residual ug special waste aron ilabay.
Dugang pa sa opisyal nga ang mga business establishments ang dili exempted sa pag-compost.
Gawas sa koleksiyon, si Limpangog nagkanayon nga ang pagpatuman sa SWM ordinance makatabang alang sa pagpahapsay sa drainage system ug mapugngan ang pagkabara sa agianan sa tubig nga mahimong hinungdan sa pagbaha.
