Adunay posibilidad nga mangayo og Temporary Restraining Order ang defense team ni Vice President Sara Duterte kung idangop nila sa Korte Suprema ang desisyon sa Senate Impeachment Court kabahin sa voting threshold sa conviction.
Matud ni defense counsel Atty. Michael Wesley T. Poa, kinahanglan pa nilang timbangon ang benepisyo ug epekto sa pag-file og TRO, lakip ang mahimong resulta kung tugotan or dili ang ilang hangyo.
Pagpaklaro ni Poa nga dili tumong sa depensa nga kuwestiyonon ang integridad sa impeachment court, apan gusto nilang mapreserbar ang ilang katungod nga hagiton ang ruling ug aksyon atol sa pagtaral.
Ang ilang pag-apil sa proceedings gihimong ad cautelam o “for caution,” “with caution,” o “as a precautionary measure” aron dili mahimong interpretasyon nga ilang gisurender o gi-waive ang maong katungod.
Dugang pa ni Poa, lahi ang impeachment proceedings sa regular courts ug mahimong ilakip sa petition ang mga punto nga ilang tan-awon nga husto o sayop kung ipadayon ang pag-apelar.
Sa pagkakaron, wala pa pinal ang desisyon sa defense team kay ikonsiderar pa niini ang posisyon ni VP Duterte.
Gipasiugda ni Poa nga ilang gitahod ang tanang opinyon sa mga senator-judge, pabor man o supak sa ilang posisyon.
