DAVAO CITY- Mas gipakusgan pa karon ang pwersa sa gimugnang Joint Task Force Marilog aron maundang ang pagbaligya sa mga ancestral land o yutang kabilin sa mga Indigenous Peoples (IPs).
Nakalatid ilalom sa RA 8371 o Indigenous Peoples Rights Act of 1997 ang pagpanalipod sa katungod sa mga kaigsoonang IP ngadto sa ilang mga yutang kabilin alang sa pagsiguro sa ekonomiya, sosyal ug kultural nga kaayohan sa mga nahisgutan.
Nasayran nga ilalom niining balaud, ang nasud Pilipinas adunay upat ka hugpong sa Interdependent Rights ug usa na niini ang Cultural Integrity.
Mao kini ang naghulagway sa pagtahod ug paghatag og pagpasidungog ngadto sa pagpanag-iya sa mga materyales, tradisyon ug kahibalo nga naggikan sa usa ka partikular nga kultura o komunidad.
Nasayran nga ang tanang yutang kabilin ang gikinahanglang marehistro ilabi na ang mga luna nga gipangtukuran og establisyemento.
Sumala ni Atty. Ronnie Bulotano, OIC-Provincial Officer sa NCIP-Davao, wala pa gayod nawagtang ang mga tawo nga nagsigeg pamaligya og mga yutang kabilin apan nakunhuran na matud pa ang baligya-palit sa maong luna nga usa ka maayong balita.
Apan giklaro sa opisyal nga dili dayon angay magpakampante busa mas gipakusgan pa gayod nila ang pagpanakop ilabi na sa Marilog District tungod hitak ang palit dinhing dapita rason nga namugna ang Joint Task Force Marilog.
