Gipahimutang sa City Council ang sugyot alang sa pagporma og dugang nga programa sa pag-ila, kompensasyon, tabang ug insentibo para sa mga Job Order o JO workers sa City Government of Davao.
Gisugyot ang maong resolusyon atol sa ika-38 regular session niadtong Setyembre 22, 2026, diin gipasiugda ang panginahanglan nga matagad ang kontribusyon sa mga JO workers sa adlaw-adlaw nga operasyon sa lokal nga kagamhanan.
Gipunting ni Councilor Atty. Diosdado Mahipus Jr., chairperson sa Committee on Socialized Housing Project ug Committee on Oversight, ang kahimtang sa mga JO workers nga nagtrabaho sa frontline ug field operations.
Lakip sa ilang giatubang ang kainit, ulan, trapiko, abog ug uban pang occupational risks isip kabahin sa ilang mga katungdanan.Gisugyot usab nga ipasusi ang posibleng pag-adjust sa kompensasyon tungod sa pagsaka sa cost of living, ingon man ang ₱1,000 nga Service Recognition Financial Assistance kada nahuman nga tuig sa serbisyo.
Apil usab sa mga gisugyot ang emergency medical assistance alang sa mga work-related injuries, libre o subsidized nga transportasyon, ug educational assistance alang sa kwalipikadong mga anak o dependents sa JO workers.
Gipasabot ni Mahipus nga dili pa dayon ipatuman o ihatag ang maong mga benepisyo pinaagi lamang sa resolusyon, tungod kay kinahanglan pa kining ipasusi sa mga concerned City offices.
Susihon pa sa mga may kalabotan nga opisina ang legal nga basehan, eligibility sa mga benepisyaryo, pagkaanaa sa pondo ug ang posibleng epekto sa panalapi sa siyudad.Sa pagkakaron, magdepende pa sa resulta sa maong mga pagsusi ang pagpatuman sa mga programa nga gisugyot alang sa mga JO workers sa City Government of Davao.
