Nanawagan ang Malacañang alang sa malinawon ug hapsay nga pagdumala sa 49th ASEAN Summit sa Nobyembre, samtang gipakusogan sa Philippine National Police ang pagpangandam alang sa seguridad sa mga foreign leader, delegado, bisita ug publiko.
Matud ni Presidential Communications Office Undersecretary Claire Castro, giila ni Pangulong Ferdinand Marcos Jr. ang katungod sa mga Pilipino sa pagpahayag sa ilang mga mulo.
Gihangyo sa Palasyo ang mga grupo nga ipahigayon sa laing adlaw ang ilang mga protesta samtang gipahigayon ang ASEAN Summit, pagpatin-aw usab niini nga dili kini nagpasbot nga gikuhaan na dayun nila ang publiko og katungod.
Samtang, gipadayon sa PNP ang koordinasyon uban sa mga concerned government agency, local government unit ug ubang security partner alang sa deployment ug seguridad sa summit nga ipahigayon Nobyembre 16 hangtod 18.
Gisundan kini sa mga pangutana kabahin sa seguridad human nakasulod ang pipila ka nagprotesta sa venue sa Luzon Economic Corridor Investment Forum.
Wala na maghatag ang Palasyo og detalye sa gidaghanon sa dugang personnel, checkpoints ug restricted areas, apan gipasaligan sa PNP nga andam kini sa pagsiguro sa luwas, malinawon ug hapsay nga pagdumala sa ASEAN Summit.
