DAVAO CITY – Gikumpirma sa Davao City Health Office nga sobra katunga matud pa sa mga apektado sa nahitabong diarrhea outbreak sa Toril District sa lungsod sa Davao ang adunay exposure o nakabisita sa Night Market sa Toril ayha kini nakasinati og mga sintomas sa kalibanga.
Gibutyag ni Dr. Ashley Lopez, hepe sa Davao CHO, nga gilangkuban kini sa 52% sa mga pasyenteng apektado.
Gikan sa 288 nga natalang kaso, 97 niini ang nakakaon og street food sa Rasay Night Market samtang 53 sab ang nakakaon og street food sa Toril Public Market.
Ning kasamtangan, wala pay conclusive result ang lokal nga panggamhanan sa kung unsa ba gayud ang hinungdan sa kontaminasyon apan kung basehan ang pahayag sa mga pasyente, gibutyag nila nga gawas sa pag-inom og tubig, nakakaon sab sila og mga street food sa maong lugar.
Gikumpirma usab sa opisyal nga anaa nay initial result sa mga gipahigayong water analysis, food sampling ug rectal swabbing apan dili pa ni mamahimong ipagula sa Davao CHO gumikan wala pa ang resulta sa gipahigayon usab nga imbestigasyon sa Department of Health Epidemiology Bureau nga gisumite sa Research Institute for Tropical Medicine.
