DAVAO CITY – Lima ka mga sakop sa Davao city Police Office (DCPOI) ang gipa-ilalom karon sa hugot nga pag-minotor human makadawat ug report nga nalambigit ang mga nahisgutang sa illegal nga sabong-sabong sa dakbayan sa dabaw. Kini ang gikumpirma ni DCPO Director Police Col Alberto Lupaz.
Gikanayon ni Lupaz nga ang nahisgutang lima ka mga police maoy responsable sa illegal nga tupada sa lagyong mga barangay sa dakbayan sa dabaw diin na-assign usab ang mga nahisgutan.
Dugang pa ni Lupaz nga aduna na siyay pangalan sa nahisgutang lima ka mga police, apan sa karon dili pa una niya kini mamahimong ibutyag ngadto sa publiko aron dili mabalda ang nagpadayon nilang imbestigasyon.
Gipanaad usab sa DCPO director nga sa higayon nga makakuha sila ug lig-ong ebidensiya ug mapamatud-an nga mipaluyo sa nahisgutang sabong-sabong diha-diha pasakahan sila ug kaso.
Sa pikas bahin, gipasalig usab ni Col Lupaz nga walay sakop sa DCPO ang nalambigit sa kontrobersiyal nga online sabong. Kini ang resulta sa gihimong inspection sa DCPO sa mga cellphone sa mga ginsakupan niini subay na usab sa kamanduan ni PNP chief Dionardo carlos.
Gipatuman kini aron masiguro nga walay mga police ang nalolong sa maong sugal, ug aron usab makasiguro nga maka-concentrate ang mga nahisgutan sa ilang trabaho ug labaw sa tanan dili sila malubong sa mga utang.
