Nakasikop ang Philippine Drug Enforcement Agency Region 11 o PDEA XI ug National Bureau of Investigation Southeastern Mindanao Regional Office o NBI SEMRO sa usa ka giingong notorious drug personality sa buy-bust operation alas-8:55 sa buntag karong adlawa sa usa ka condominium sa Bacaca Road, Barangay 19-B, Davao City.
Giila ang nadakpan nga si “alias Boss Kim,” 49 anyos, human gibaligya niini ngadto sa poseur buyer ang usa ka sachet sa suspected shabu nga gibana-banang lima ka gramos ug street value nga P35,000.
Nakuha usab ang upat ka sachet sa suspected shabu nga adunay hiniusang gibug-aton nga mga 50 gramos.
Lakip sa nakumpiska ang gibana-banang upat ka milliliters nga suspected marijuana oil, drug paraphernalia ug buy-bust marked money.
Sa kinatibuk-an, mikabat sa P375,000 ang gibanabana nga bili sa mga ilegal nga droga nga nasikop atol sa operasyon.
Atubangon sa nadakpan ang tukmang kaso tungod sa giingong paglapas sa Republic Act 9165 o Comprehensive Dangerous Drugs Act of 2002, as amended.
Samtang, mipahimangno si PDEA XI Regional Director Atty. Benjamin G. Gaspi batok sa illegal drug trade ug giawhag ang publiko nga motabang sa awtoridad pinaagi sa pagreport sa susamang kalihokan. | VIA BOMBO EROS PAJOTA
