DAVAO CITY – Opisyal na sab nga magpahigayon ang Davao Oriental Regional Science High School (DORSHS) sa Mati City ug face-to-face (F2F) classes sa Mayo 16, 2022 diin unang higayon kini sukad nga nagsugod ang Covid-19 pandemic.
Sumala pa kang Ben Tesiorna, information officer sa City Information Office (CIO), gikanayong hybrid learning ang gipatuman karun sa nahisgutan nga tulonghaan diin nagapahigayon kini ug F2F classes ug online learning.
Samtang hugtanon pa gihapon nga gipatuman ang pipila ka mga lakang arun masiguro ang kaluwasan sa panglawas sa mga estudyante sama na lamang social distancing ingon man ang limitado lamang ang estudyante nga pasudlon sa matag classroom nga anaa lamang sa 20.
Gawas niini, kinahanglan sab nga i-practice ang tukma nga pagsuot ug facemasks ingon man hand hygiene ngadto sa mga bata.
Kahinumduman nga una na sab nga nagpahigayon ang nahisgutan nga trulonghaan ug simulation run saq F2F classes sa milabay nga Abril 22 nga gisalmutan sa 120 ka mga estudyante gikan sa Grades 7 hangtud 12.
Gikanayong usa kini sa mga rekisitos sa tanan nga mga tulonghaan ayha hingpit nga tugtan nga makapahigayon ug Face to face classes.
Nasayran sab sa opisyal nga gawas sa DORSHS, lima pa ka mga tulonghaan sa Mati City ang nagpahigayon na sab karun ug limited F2F classes, nga gilangkuban sa Culian Integrated School, Mati Central District School, Rabat Rocamora Mati Central SPED School, Asuncion Rondina Perez Memorial School, ug Buso National High School.
