Miingon si Davao City 1st District Rep. Paolo “Pulong” Duterte nga naanad na ang ilang pamilya sa mga pagdaot ug pagbatikos nga iyang giingong kabahin na sa politika.
Matud ni Pulong sa usa ka interview, dugay na nilang nasinati ang pag-atake batok sa ilang pamilya, lakip na kaniadto panahon sa administrasyon ni kanhing Pangulong Corazon “Cory” Aquino.
Gipasabot niya nga dili na kini dakong butang alang kanila tungod kay naanad na sila sa mga pagdaot nga nalambigit sa politika.
Dugang pa ni Pulong, dili na nila kini padak-on ug mas pilion hinuon nila ang pagbalik sa Davao aron magpuyo og yano ug pribadong kinabuhi.
Gipasalamatan usab niya ang mga tawo nga padayong naghatag og suporta sa ilang pamilya, ilabina sa iyang igsoon nga si Vice President Sara Duterte.
Atubangon karon ni Sara ang impeachment proceedings sa Senado human sa mga artikulo sa impeachment nga gisumite batok kaniya.
Gihangyo usab ni Pulong ang katawhang Pilipino nga iampo ang nasud tungod sa iyang kabalaka sa kahimtang sa Pilipinas.
Matud pa niya, nagkagrabe ang utang sa nasud samtang nagpadayon ang mga problema nga giatubang sa gobyerno ug sa katawhan.
