Nakasikop ang Davao City Police Office o DCPO og 120 ka indibidwal atol sa 120 ka operasyon batok sa nagkadaiyang paglapas sa balaod sulod sa usa ka semana.
Nakapahigayon ang kapulisan og 36 ka anti-illegal drug operations nga misangpot sa pagkadakop sa 44 ka suspek ug pagkakumpiska sa 415.55 gramos nga gituohang shabu nga mokabat sa P2.825 milyon ang standard drug price.
Nasakmit usab sa maong mga operasyon ang 75.34 gramos nga marijuana nga adunay gibanabanang standard drug price nga P9,040.80.
Misukol usab ang DCPO sa illegal gambling pinaagi sa 15 ka operasyon nga misangpot sa pagkadakop sa 25 ka sugarol, pagkakumpiska sa P6,090 nga bet money ug pagsaka sa 15 ka kaso.
Nakagukod usab ang kapulisan og 46 ka operasyon batok sa mga wanted persons, diin 46 ang nadakpan lakip ang 20 nga most wanted persons.
Samtang, lima ka suspek ang nasikop atol sa 21 ka operasyon batok sa loose firearms, diin lima ka armas ang nakumpiska, 16 ang boluntaryong gitugyan ug upat ka kaso ang gipasaka.
Gipasiugda sa DCPO ubos sa pagpanguna ni PCOL Peter Bauzon Madria ang padayong pakigtambayayong sa komunidad, mga barangay officials ug Local Government Unit aron mapalig-on ang kalinaw ug seguridad sa Davao City.
