Nag-andam ang Department of Social Welfare and Development o DSWD XI sa pagpatuman sa Walang Gutom Program nga gitumong sa 12,838 ka pamilya sa rehiyon nga nakasinati og food insecurity.
Gipahigayon sa ahensya niadtong Septiyembre 24 ang orientation alang sa mga personnel niini aron maandam ang mga proseso ug mekanismo sa pagpatuman sa programa.
Gitawag nga Reducing Food Insecurities and Undernutrition through Electronic Vouchers o REFUEL Walang Gutom Program ang maong inisyatiba nga nagtumong sa pagtabang sa mga kwalipikadong pamilya nga kulang sa pagkaon ug nutrisyon.
Gitarget sa programa ang mga benepisyaryong pamilya sa upat ka probinsya sa Davao Region, lakip ang Davao del Norte, Davao de Oro, Davao del Sur ug Davao Oriental.
Gipaila usab atol sa orientation ang application tool nga gamiton sa pag-ila, pag-validate ug pagdumala sa mga kwalipikadong benepisyaryo.
Matud sa DSWD, gilauman nga mas mapalig-on sa programa ang mga lakang batok sa kagutom ug food insecurity, ilabina alang sa mga pamilyang labing nanginahanglan.
Makadawat ang kwalipikadong benepisyaryo og P3,000 nga food credits matag bulan nga magamit sa pagpalit og balanse ug masustansyang pagkaon sa accredited retailers.
Dugang pa, kabahin sa programa ang Walang Gutom Kitchen, diin padayon nga gipalapdan sa DSWD ang serbisyo aron mahatagan og pagkaon ang mga pamilyang nakasinati og kagutom.
