DAVAO CITY – Gisugdan na karon sa Davao City COVID-19 Task Force ang pagpahigayon ug “family profiling” sa tanan 182 ka mga barangay kini arun masubay kung si kinsa nga miyembro sa pamilya ang wala pa nabakunahan batok sa kagaw o wala pa nakadawat ug booster shots.
Sumala pa kang Dr. Michelle Schlosser, spokesperson sa COVID-19 Task Force, nga ang “family profiling” usa ka lain nga estratehiya sa lokal nga kagamhanan arun nga maawhag pa ang publiko nga mahinungdanon ang pagpabakuna sanglit nagpabilin pa ang bahad sa kagaw.
Gawas sa COVID-19 vaccines, kalakip sab sumala pa sa data nga ilang kuhaon ang gilangkuban sa information sa immunization status arun nga masayran kung pila ka mga bata ang wala pa nakadawat sa ilang routine vaccines diin kalakip na niini ang bakuna arun makalikay sa measles, mumps, ug rubella (MMR) ingon man flu.
Gamiton sumala pa ang data sa barangay aron nga mapahugtan pa ang education campaign sa local government sa vaccination.
Kinahanglan sumala pa nga palig-onon pa ang vaccination drive sa kumunidad human nga namatikdan sa lokal nga kagamhanan nga ubos lamang ang nagmahimulos sa inoculation nga gitanyag sa gobyerno.
Magpabilin matud pa ang siyudad sa “no mandatory vaccine” policy apan mutanyag ang lokal nga kagamhanan niini ngadto sa katawhan isip “option.”
Kahinumduman nga anaa sa 1,000 contract tracers ang mipailalom na sa pagbansay alang sa “family profiling” ayha kini ipakatag sa mga nagkadaiyang kumunidad kaabag ang Barangay Health Emergency Response Teams (BHERTs) ug health district offices.
