DAVAO CITY – Nakadayeg ang Commander sa Eastern Mindanao Command (EastMinCom) nga si LtGen. Greg T. Almerol human nga hingpit na nga nabungkag ang Communist Terrorist Group (CTG) sa iyang area of responsibility human nga ang nahibilin nga liderato sa usa sa pinakadugay na nga guerilla units sa nasud ang mibalik na sa sabakan sa kagamhanan sa Purok San Miguel, Brgy Kidawa, Laak, Davao de Oro.
Kahinumduman nga 13 ka mga lideras ug miyembro sa Guerilla Front 3 (GF3), Sub-Regional Committee 4 (SRC4) sa Southern Mindanao Regional Committee (SMRC), ang mitahan sa mga tropa sa 1001st Infantry Brigade’s 60th Infantry Battalion (60IB), 25th Infantry Battalion (25IB) ug intel units human ang sunod-sunod nga focused military operations nga gimando ni LtGen. Almerol sukad sa milabay nga tuig diin na-neutralize nila ang top-ranking leaders hinungdan nga mihuyang ang ilang morale nga magpadayon pa sa ilang pakigbatok.
Ang mga surrenderees gipangunahan ni Renard Galos Catarata alias SM, GF3’s Commanding Officer, ug Rico Ogong Kipitan alias Bryan, Vice Commanding Officer ug lain pa nga kaubanan niini nga nagkadala ug 13 ka mga high-powered firearms nga gilangkluban sa walo ka mga M16 rifles, duruha ka M653 rifles, usa ka AK 47 rifle, DPMS rifle, Caliber 9mm Pistol, ug war material nga gilangkuban sa pipila ka mga magazines, nagkadaiyang bala ug medical supplies.
Nauna na nga gibutyag ni LtGen. Almerol nga daghanan ang mubalik sa kagamhanan gumikan kay sunod-sunod na nga nabungkag ang CTG units ug pagkapatay sa mga Top-ranking leaders sa mga rebelde atol sa gilusad nga military operations.
Gawas sa mga nahisgutan, ubay-ubay sab ka mga masa ang mitahan sa kagamhanan sukad sa m ilabay nga tuig.
Kadaghanan sa mga nahisgutan ang nakaamho nga magbag-o gumikan sa mga programa nga ginatanyag sa kagamhanan.
